زعما نشري Playstation 5 ولا Xbox Series X؟

أما واحد يمشي معاي ومع إحتياجاتي وأما واحد ميمشيش؟ وهل سعرهم زي بعض؟ في المقالة هادي حنتناولوا بالتفصيل كل ما المعلومات يلي متوفرة عندنا حاليا بخصوص الجهازين القادمين وعلى أمل ان نساعدوك تاخد القرار الصح. خلينا أول شي نقولوا أن الجهازين يعتبروا أجهزة قوية وممتازة ومفيش أي شك أنك حتكون سعيد مع أي واحد فيهم حتختاره، لكن خلي في بالك ان في فرق ما بيناتهم.

أول شئ الجهازين تصميمهم عصري وغريب إلى حد ما: Xbox جاي بتصميم "مكعب" وبـ 3 مداخل USB type A وحدة من الأمام وإثنين من خلف الجهاز, عندنا مدخل HDMI 2.1 يلي تدعم صورة بدقة 4k علي 120Hz, و8K علي 60Hz وطبعا مدخل Ethernet لتوصيل الإنترنت بالكابل مع زر Kensington Lock للحماية زي ما كان في الجيل يلي فات بالإضافة إلى مدخل Storage expansion وهادي مفاجأة Microsoft الجديدة يلي تمكنك من إدخال هارديسك إضافي ويشتغل كمساحة إضافية, زي فكرة الMicro SD يلي تركب علي الهواتف, الإشكالية الوحيدة هي أن المدخل هذا مش حيدعم إلا هارديسكات SSD طبعا ومن نوع خاص حتوفره شركة Microsoft لاحقا بعد إطلاق الجهاز, نفس فكرة الـPS5 يلي حنتكلموا عليها شوي ثاني.

من الناحية الثانية PS5 جاي بتصميم على هيئة برج وباللون الأبيض، ومن ناحية الحجم فالـ PS5 حيكون أكبر من الـ Xbox Series X وفي الواقع لحد الأن وفقا للأرقام الواضح أن الـ PS5 حيكون أكبر من أي Console سابق تمت صناعته، ويقال إنه حيكون وزنه حوالي 4.8 كيلوجرام. بالنسبة للمداخل Sony مورتناش إلا الجزء الأمامي للجهاز ويلي حسب ما يبان حيكون فيه مدخل USB Type C ومدخل USB Type A, ولكن حسب التوقعات الجزء الخلفي حيكون فيه مداخل HDMI 2.1- Ethernet- PSVR1- PSVR2 .

طبعاً يلي معروف حالياً أن حيكون في نسختين من ال PS5 النسخة الإعتيادية والنسخة الرقمية، النسخة الرقمية زي ما يوحي الاسم فهي مش حتدعم مدخل أقراص وحيكون الاعتماد بشكل تام على النسخ الرقمية من الألعاب، يعنى حتشري الألعاب من المتجر الإلكتروني وتحملها في جهازك مباشرة. خلي نتكلموا توا على الجزء المهم وهو الأداء، أما جهاز أداءه أفضل؟
في الواقع إجابة السؤال هذا بأحد الخيارين تعتبر صعبة وبعيدة شوية عن الواقع لأن كل من الجهازين عنده نقاط قوة ونقاط ضعف حنحاولوا نوقفوا عليها بشكل سريع ونبسطوا المعلومات التقنية على قدر الإمكان.

المعالجات (CPUs):
الجهازين حيكونوا بمعالج AMD Ryzen 4th Gen | Zne2
ويلي يعتبر من أقوى معالجات AMD الحديثة.
الإثنين حيكونوا ثمانيات النواة ولكن الإختلاف أن في Xbox المعالج حيكون على تردد 3.8GHz والـ PS5 على تردد 3.5GHz.

معالجات الصور (GPUs):
فمن جديد الجهازين حيكونوا بنفس الكرت وهو:
AMD Navi/RDNA 2.0 Architecture.
ويلي للعلم مزال مش متوفر حتى لأجهزة الحاسوب، أقل شي مش قبل نهاية العام.

بالنسبة للـ RAM او الذاكرة العشوائية فالجهازين حيكونوا بـ 16GB GDDR6. وفيما يتعلق بالمساحة وأقراص التخزين ال PS5 حيكون مساحته 825GB والـ Xbox Series X حيكون 1TB والزوز طبعا من نوع SSD. فيعني لو تهمك المساحة ممكن الـ Xbox حيكون الخيار الأنسب ليك ولكن خلي نتكلمواعلى سرعة أقراص التخزين هادي. قرص الـ Xbox Series Xعنده قدرة نسخ بسرعة 2.4GB في الثانية وهذا يعتبر أسرع بـ 50 مرة من سرعة نسخ البيانات في الـ Xbox one الحالي. ولكن مع هذه السرعة كلها الـ PS5 قدر يحطمها بالقرص الجديد يلي سرعته 5.5GB في الثانية ويلي يعتبر أسرع بـ 110 مرة من الـ PS4 الحالي وأيضاً الـ Xbox one. وبما أن أحني قاعدين نتكلموا علي المساحة والأقراص الصلبة فـ زي ما قلنا إمبكري, الـ Xbox Series X حيكون عنده مدخل لإضافة قرص SSD خاص من تصميم Microsoft وبالتعاون مع شركة Segate الرائدة في صناعة الأقراص الصلبة وبمساحة إضافية 1TB, ولكن لازم ما تشري القرص الخاص بـ Microsoft ويلي حيتوفر في الأسواق بعد إطلاقة الجهاز.

أما بالنسبة للـ PS5 فشركة Sony خلت الخيار هذا مفتوح للمستخدين، بمعنى إنك تقدر تشري أي قرص SSD وتغير القرص بروحك زي في الجيل الحالي من أجهزة PS4 إلا أن في مشكلة وحدة. الشرط الوحيد باش يتمكن الـ PS5 من قراء القرص يلي حتغيره ويشغل الألعاب، إن سرعته تكون متوافقة مع سرعة القرص يلي جاي مع الجهاز وهي زي ما قلنا 5.5GB في الثانية، ولكن للأسف وفي الوقت الحالي لا يوجد أي قرص SSD من أي شركة طرف ثالث بالسرعة هادي، ولكن متخافوش بكل تأكيد أول ما ينزل الجهاز في الأسواق كل الشركات الرائدة في صناعة الأقراص حتتنافس لتوفير أقراص بالسرعة هذه وبكل المساحات المطلوبة، ولكن نقدر نقولك من توا أن سعرهم حيكون غالي للأسف. طبعاً تقدر توصل أقراص الجيل هذا الإعتيادية بالـ PS5 والـ Xbox Series X ولكن تقدر تلعب عليهم ألعاب الجيل هذا بس، لأن ببساطة الأقراص هذه تعتبر بطيئة على ألعاب الجيل الجديد.

ماذا يحدد مبيعات أي جهاز؟ الألعاب:
زي ما نعرفوا ديما وزي ما تعودنا أن حصريات Sony لا بديل لهم، والجيل الجاي مش حيكون فيه أي إختلاف. شركة Sony مجهزة قائمة بألعاب حصرية وعلى رأسها Horizon: Forbidden West. من الناحية الثانية Microsoft قالت إن من الانطلاقة ولمدة سنتين مش حيكون في ألعاب حصرية للـ Xbox Series X يعني كل الألعاب يلي حتنزل جديدة حتنزل على كل أجهزة الجيل الحالي وأيضا الـ PC ولكن للأسف مش حتكون الألعاب هادي قفزة كبيرة من ناحية الرسوميات زي حصريات الـ PS5 يلي لأخذ العلم مش حتشتغل على الـ PS4.

أما جهاز صورته أفضل؟
إجابة السؤال هذا شوية صعبة، بس خود المعلومات هادي:
لو كنت تبي تلعب Multiplayer Games زي Fortnite أو Call of duty فالخيار الأنسب هو Xbox Serie X والسبب هو الـ Frame Rate العالي في الجهاز، Microsoft قالت أن الألعاب علي Xbox Series X حتشتغل علي 4K 60-120FPS بينما Sony قالت أن الألعاب علي الـ PS5 حتشتغل علي 4K او على 60FPS يعني لازم تختار، وطبعا مطورين الألعاب يلي يشتغلوا علي ألعاب تعمل علي المنصتين قالوا أن الألعاب حتكون دقتها أعلي والـ Frames أعلي علي منصة Xbox Series X.

السعر: أعلنت شركة Microsoft الأسبوع هذا على أسعار منصاتها الجديدة وهي كالآتي: Xbox Series X 499$ وXbox Series S 299$. طبعاً Xbox Series S حنتكلموا عليه بالتفصيل والفريق بينه وبين Xbox Series X في مقالة جاية. وبالنسبة لـ Sony فمزال لم تعلن على أسعار منصتها الجديدة، ويلي في الإنترنت هو مجرد توقعات.

الخلاصة: في أول سنتين من إنطلاقة منصات PS5 وXbox Series X حيكون في العديد من حصريات Sony يلي صورتها ورسومياتها حتكون خلابة ولكن للأسف إلى حد الأن مافيش أي تأكيد على Frame rate عالي من شركة Sony والشي هذا أكيد حينقص من تجربة ألعاب التنافس والـ Multiplayer, بينما Xbox Series X حيوفر Frame rate عالي ودقة عالية ولكن بدون أي ألعاب فعلا حصرية للجيل الجديد وتستغل كل إمكانياته..

بعد ما سمعت مننا إحني، زعما أنت شن رأيك وأما جهاز قررت تشري؟
هل الجيل الجديد هو الوقت يلي معش نقدروا نتهاونوا فيه على قصة الـ Frame rate أما انت Sony Diehard ومتقدرش تستغنى عن الحصريات؟